ಶ್ರೀಃ ಶ್ರೀಮತೇ ಶಠಕೋಪಾಯ ನಮಃ ಶ್ರೀಮತೇ ರಾಮಾನುಜಾಯ ನಮಃ ಶ್ರೀಮದ್ವರವರಮುನಯೇ ನಮಃ ಶ್ರೀವಾನಾಚಲ ಮಹಾಮುನಯೇ ನಮಃ
ಕುವಲಯಾಪೀಡ ಆನೆಯನ್ನು ಸಂಹರಿಸಿದ ನಂತರ, ಕೃಷ್ಣ ಮತ್ತು ಬಲರಾಮರು ಮಲ್ಲಯುದ್ಧದ ಅಖಾಡವನ್ನು ಪ್ರವೇಶಿಸಿದರು. ಆ ಸಮಯದಲ್ಲಿ, ಅಲ್ಲಿದ್ದ ಮಲ್ಲರು ಹಾಗೂ ಸ್ತ್ರೀ-ಪುರುಷರೆಲ್ಲರೂ ಅವರಿಬ್ಬರನ್ನೂ ನೋಡಿ ಬೆರಗಾದರು. ಅಲ್ಲಿದ್ದ ಸಜ್ಜನರೆಲ್ಲರೂ ಅವರ ತೇಜಸ್ಸನ್ನು ಕಂಡು ಅವರ ದೈವಿಕ ಸ್ವರೂಪವನ್ನು ಅರ್ಥಮಾಡಿಕೊಳ್ಳಬಲ್ಲವರಾಗಿದ್ದರು.
ಆ ಮಲ್ಲರು ಮಹಾನ್ ಬಲಶಾಲಿಗಳೂ ಹಾಗೂ ಮಹಾಕಾಯರೂ ಆಗಿದ್ದರು. ಚಾಣೂರನು ಕೃಷ್ಣ ಮತ್ತು ಬಲರಾಮರನ್ನು ಮಲ್ಲಯುದ್ಧಕ್ಕೆ ಆಹ್ವಾನಿಸಿದನು. ಚಾಣೂರ, ಮುಷ್ಟಿಕ ಮುಂತಾದ ಮಲ್ಲರಿಗೆ ಕೃಷ್ಣ ಮತ್ತು ಬಲರಾಮರ ಮಹಿಮೆಯ ಬಗ್ಗೆ ಚೆನ್ನಾಗಿ ತಿಳಿದಿದ್ದರೂ,ಅವರು ಮನಸ್ಸಿಲ್ಲದೆಯೇ ಅವರೊಂದಿಗೆ ಸೆಣಸಾಡಲು ಬಂದರು.
“ಹೇಡಿಯಾಗಿ ಉಳಿದು, ಈ ಪಂದ್ಯದಿಂದ ಹಿಂದೆ ಸರಿದು ಕಂಸನ ಕೈಯಲ್ಲಿ ಸಾಯುವ ಬದಲು, ಧೈರ್ಯದಿಂದ ಹೋರಾಡಿ ಕೃಷ್ಣ ಮತ್ತು ಬಲರಾಮರ ಕೈಯಲ್ಲಿ ಮುಕ್ತಿ ಪಡೆಯುವುದು ಲೇಸು” ಎಂದು ಅವರು ಯೋಚಿಸಿದರು. ಸುಕುಮಾರರಾದ ಕೃಷ್ಣ ಮತ್ತು ಬಲರಾಮರನ್ನು ಕಂಡು, ಅವರ ಮೇಲಿನ ಅಕ್ಕರೆಯಿಂದಾಗಿ, ಸಭಿಕರು ಇದೊಂದು ಈಡುಜೋಡಿಯಲ್ಲದ ಯುದ್ಧವೆಂದು ಭಾವಿಸಿ ಹೆದರಿದರು.
ಕೃಷ್ಣನು ಚಾಣೂರನೊಂದಿಗೆ ಮತ್ತು ಬಲರಾಮನು ಮುಷ್ಟಿಕನೊಂದಿಗೆ ಹೋರಾಡಿ, ಇಬ್ಬರೂ ಮಲ್ಲರನ್ನು ಕೊಂದರು. ತಮ್ಮ ಮೇಲೆ ದಾಳಿ ಮಾಡಲು ಬಂದ ಇತರ ಮಲ್ಲರನ್ನೂ ಅವರು ಸಂಹರಿಸಿದರು. ಇದನ್ನು ಕಂಡ ಜನರೆಲ್ಲರೂ ಸಂತೋಷಗೊಂಡರು. ಆದರೆ ಆನೆ, ಮಾವುತ ಮತ್ತು ಈಗ ಮಲ್ಲರನ್ನು ಕೊಂದಿದ್ದರಿಂದ ಕಂಸನು ತುಂಬಾ ಭಯಭೀತನಾದನು.
ಆಳ್ವಾರರ ಪಾಶುರಗಳಲ್ಲಿ ಮಲ್ಲರ ಸಂಹಾರ:
ಕೃಷ್ಣನು ಮಲ್ಲರನ್ನು ಗೆದ್ದ ಪರಿಯನ್ನು ಆಳ್ವಾರರು ಅನೇಕ ಪಾಶುರಗಳಲ್ಲಿ ಎತ್ತಿ ತೋರಿಸಿದ್ದಾರೆ:
ಪೆರಿಯಾಳ್ವಾರ್ ತಮ್ಮ ಪೆರಿಯಾಳ್ವಾರ್ ತಿರುಮೊಳಿಯಲ್ಲಿ ಹೀಗೆ ಹೇಳುತ್ತಾರೆ: “ಏವಿಟ್ರುಚ್ ಚೆಲ್ವಾನ್ ಎನ್ರೆದಿರ್ಂದು ವಂದ ಮಲ್ಲರೈ ಸಾವತ್ ತಗರ್ತ್ತ ಸಾಂದಣಿ ತೋಳ್ ಚದುರನ್” (ಕಂಸನ ಆಜ್ಞೆಯ ಮೇರೆಗೆ ಯುದ್ಧ ಮಾಡಲು ಬಂದ ಮಲ್ಲರನ್ನು, ಕೃಷ್ಣನು ತನ್ನ ದೇಹಕ್ಕೆ ಲೇಪಿಸಿದ್ದ ಶ್ರೀಗಂಧದ ಲೇಪನವು ಅಲುಗಾಡದಂತೆ ಚಾಕಚಕ್ಯತೆಯಿಂದ ನಾಶಪಡಿಸಿದನು).
ಆಂಡಾಳ್ ನಾಚ್ಚಿಯಾರ್ ತಿರುಪ್ಪಾವೈನಲ್ಲಿ “ಮಲ್ಲರೈ ಮಾಟ್ಟಿಯ ದೇವಾದಿ ದೇವನ್” (ಮಲ್ಲರನ್ನು ಕೊಂದ ದೇವಾದಿದೇವನೇ!) ಎಂದು ಹೇಳುತ್ತಾರೆ.
ನಮ್ಮಾಳ್ವಾರ್ ತಮ್ಮ ತಿರುವಾಯ್ಮೊಳಿಯಲ್ಲಿ “ನಿಗರಿಲ್ ಮಲ್ಲರೈಚ್ ಚೆಟ್ರದುಮ್” (ಸಾಟಿಯಿಲ್ಲದ ಮಲ್ಲರನ್ನು ಸಂಹರಿಸಿದನು) ಎಂದು ಹೇಳುತ್ತಾರೆ.
ತಿರುಮಂಗೈ ಆಳ್ವಾರ್ ತಮ್ಮ ತಿರುನೆಡುಂದಾಂಡಗಂನಲ್ಲಿ “ಮಲ್ಲಡರ್ತ್ತು ಮಲ್ಲರೈ ಅನ್ರು ಅಟ್ಟಾಯ್” (ಮಲ್ಲರೊಂದಿಗೆ ಹೋರಾಡಿ ಅವರನ್ನು ಅಂದು ಕೊಂದವನೇ) ಎಂದು ಸ್ತುತಿಸುತ್ತಾರೆ.
ಈ ಲೀಲೆಯ ಸಾರಾಂಶ:
- ಭಗವಂತನು ಗೊಲ್ಲರ ಕುಲದಲ್ಲಿ ಮನುಷ್ಯನಂತೆ ಅವತರಿಸಿ ಚಿಕ್ಕ ಮಗುವಾಗಿದ್ದರೂ, ಅವನ ಸಾಮರ್ಥ್ಯದಲ್ಲಿ ಯಾವುದೇ ಕೊರತೆಯಿರುವುದಿಲ್ಲ. ಅವನು ತನ್ನ ಶತ್ರುಗಳನ್ನು ಸುಲಭವಾಗಿ ಸೋಲಿಸುತ್ತಾನೆ.
- ಶತ್ರುಗಳು ಕೂಡ ಭಗವಂತನ ಮಹಿಮೆಯನ್ನು ಅರ್ಥಮಾಡಿಕೊಂಡಾಗ, ಅವನೊಂದಿಗೆ ಹೋರಾಡಿ ಸಾಯುವುದನ್ನು ಒಂದು ಭಾಗ್ಯವೆಂದು ಪರಿಗಣಿಸುತ್ತಾರೆ.
ಅನುವಾದ – ಅಡಿಯೇನ್ ಕಸ್ತೂರಿರಂಗನ್ ರಾಮಾನುಜ ದಾಸನ್
ಪುರಾವೆ ಓದುವಿಕೆ – ಅಡಿಯೇನ್ ಹೇಮಲತಾ ರಾಜನ್ ರಾಮಾನುಜ ದಾಸಿ
ಮೂಲ – https://granthams.koyil.org/2023/10/06/krishna-leelas-29-english/
ಆರ್ಕೈವ್ ಮಾಡಲಾಗಿದೆ – https://granthams.koyil.org
ಪ್ರಮೇಯಮ್ (ಗುರಿ) – https://koyil.org
ಪ್ರಮಾಣಮ್ (ಗ್ರಂಥಗಳು) – https://granthams.koyil.org
ಪ್ರಮಾತಾ (ಬೋಧಕರು) – https://acharyas.koyil.org
ಶ್ರೀವೈಷ್ಣವ ಎಜುಕೇಶನ್ / ಮಕ್ಕಳ ಸಾಹಿತ್ಯ – https://pillai.koyil.org