శ్రీః శ్రీమతే శఠకోపాయ నమః శ్రీమతే రామానుజాయ నమః శ్రీమత్ వరవరమునయే నమః
<< 51 – అర్జున దుర్యోధనులకు సహాయం చేయుట
కృష్ణుని దివ్య సంకల్పానుసారంగా మహాభారత యుద్ధం ప్రారంభమైంది. కృష్ణుడు అర్జునునికి సారథిగా నిలిచాడు. తన విశాలమైన సైన్యాన్ని దుర్యోధనునికి ఇచ్చాడు. పాండవులు, కౌరవులు ఇద్దరి పక్షాల కొరకు అనేక మహా సైన్యాలు సమకూరాయి.
యుద్ధరంగంలో కూడిన యోధులను స్పష్టంగా చూడాలనే కోరికతో అర్జునుడు, తమ రథాన్ని రెండు సైన్యాల మధ్య నిలపమని కృష్ణుణ్ణి ప్రార్థించాడు. కృష్ణుడు అతని కోరికను నెరవేర్చాడు. అప్పుడు అర్జునుడు భీష్ముడు, ద్రోణుడు మొదలైన తన బంధువులను, ఆచార్యులను చూసి దిగ్భ్రాంతి చెందాడు. తన శోకాన్ని కృష్ణుని ముందు వ్యక్తం చేశాడు. “ఇలాంటి యుద్ధం ద్వారా పొందే రాజ్యం నాకు అవసరం లేదు” అని చెప్పి, తన గాండీవ ధనుస్సును క్రింద పెట్టి, కృష్ణుణ్ణి శరణ్యుడిగా భావించి శరణాగతి చేశాడు.
అప్పుడు కృష్ణుడు భగవద్గీతోపదేశం ద్వారా అర్జునుని సంశయం తొలగించాడు. శ్రీమద్భగవద్గీతలో కృష్ణుడు అనేక తత్త్వాలను అర్జునునికి ఉపదేశించాడు. మన పూర్వాచార్యులు వాటిని ఎంతో స్పష్టంగా వివరించారు. అవి:
• తత్త్వవివేకం – చిత్ (చేతనులు), అచిత్ (జడపదార్థాలు), ఈశ్వరుడు (పరమాత్మ) అనే మూడు తత్త్వాలను యథార్థంగా గ్రహించడం.
• నిత్యత్వం మరియు అనిత్యత్వం – ఆత్మ నిత్యమైనది; అచిత్ అనిత్యమైనది.
• నియంత్రుత్వం – సమస్తానికి నియంత్రకుడు భగవానుడే.
• సౌలభ్యం – భగవంతుని సౌలభ్య స్వభావం.
• సామ్యం – భగవంతుడు అందరిపట్ల సమభావంతో ఉండడం.
• అహంకార దోషం – అహంకారం వల్ల కలిగే దోషాలు.
• ఇంద్రియబలం – ఇంద్రియాలు మనపై చూపే ప్రభావం.
• మనఃప్రాధాన్యం – మనస్సు యొక్క ప్రాముఖ్యత.
• సుకృతి భేదం – నాలుగు రకాల సత్పురుషులు.
• దేవాసుర విభాగం – దైవస్వభావాలు మరియు ఆసురస్వభావాల వివరణ.
• విభూతి యోగం – తన అనంత వైభవాలను వెల్లడించడం.
• విశ్వరూప దర్శనం – తన విశ్వరూపాన్ని ప్రదర్శించడం.
• సాంగభక్తి – కర్మయోగం, జ్ఞానయోగం సహాయకాలుగా ఉండే భక్తియోగం.
• రెండు రకాల ప్రపత్తి – భక్తియోగానికి అంగమైన శరణాగతి మరియు స్వతంత్ర ఉపాయమైన శరణాగతి.
ఈ విధంగా అనేక తత్త్వాలను అర్జునునికి బోధించిన అనంతరం, “ఫలాపేక్ష లేకుండా నీ కర్తవ్యమైన యుద్ధాన్ని చేయి” అని కృష్ణుడు ఉపదేశించాడు. చివరికి అర్జునునితో “కృష్ణా! నీవు చెప్పినట్లే నేను చేస్తాను” అని చెప్పించాడు. ఆ తరువాత యుద్ధం ప్రారంభమైంది.
ఆళ్వార్లు, కృష్ణుడు స్వయంగా ఉపదేశించిన గీతా వాక్యాలను వైభవంగా కీర్తించారు. మానవజన్మ పొందిన ప్రతి ఒక్కరూ తమ ఆత్మోద్ధరణ కోసం గీతను అధ్యయనం చేసి, దాని సారాన్ని సరిగా గ్రహించవలసినదని వారు బలంగా నొక్కి చెప్పారు. ప్రత్యేకించి శ్రీవైష్ణవులకు గీత అత్యంత ప్రాముఖ్యమైనది. ఎందుకంటే అందులో కృష్ణ చరమశ్లోకం అయిన గీతా 18.66 ఉంది: “సర్వధర్మాన్ పరిత్యజ్య మామేకం శరణం వ్రజ । అహం త్వా సర్వపాపేభ్యో మోక్షయిష్యామి మా శుచః ॥” (అన్ని ఉపాయాలను విడిచిపెట్టి నన్నే ఏకైక ఉపాయంగా శరణు పొందు. నేను నిన్ను సమస్త పాపాల నుండి విమోచింపజేస్తాను. శోకించకు.) ఈ చరమశ్లోకం పంచసంస్కార సమయంలో ఉపదేశించబడే రహస్యమంత్రాలలో ఒకటి. శ్రీవైష్ణవులు గ్రహించి అనుసరించవలసిన అత్యంత ప్రధానమైన సిద్ధాంతంగా ఇది పరిగణించబడుతుంది.
- తిరుమళిశై ఆళ్వార్ నాన్ముగన్ తిరువందాది 71వ పాశురంలో ఇలా అన్నారు: “సేయన్ అణియన్ సిరియన్ మిగపేరియన్ ఆయన్ తువరిక్కోనాయ్ నిన్ఱ మాయన్ అన్ఱ ఓదియ వాక్కతనై కల్లార్ ఉలగత్తిల్ ఏదిలరాయ్ మేయ్జ్ఞానమిల్” (అందనివాడై, అదే సమయంలో సులభంగా చేరదగినవాడై, చిన్నవాడై, అదే సమయంలో అనంతమహిమాన్వితుడై, గోపబాలుడిగా అవతరించి, ద్వారకాధిపతిగా వెలిగిన పరమాత్ముడు మహాభారత యుద్ధంలో ఉపదేశించిన గీతను (ప్రత్యేకంగా చరమశ్లోకాన్ని) నేర్చుకోని వారు ఈ లోకంలో భగవంతునికి విరోధులవలె భావింపబడతారు; వారికి నిజమైన జ్ఞానం ఉండదు.)
- నమ్మాళ్వార్ తిరువాయ్మొళి 4.8.5లో ఇలా అన్నారు: “అఱివినాళ్ కురైవిల్లా అగలజ్ఞానత్తవర్ అఱియ నెఱియెళ్లాం ఎదుత్తురైత్త నిఱై జ్ఞానత్తఱుమూర్తి” (తమలో జ్ఞాన లోపం ఉందని కూడా గ్రహించని ఈ విశాల ప్రపంచంలోని జనులు తెలుసుకోవలసిన సమస్త మార్గాలను సంక్షిప్తంగా, స్పష్టంగా ఉపదేశించిన పరిపూర్ణ జ్ఞానస్వరూపుడు భగవానుడే.)
మన ఆచార్యులు కూడా గీతాధ్యయన అవసరాన్ని ఎంతో బలంగా వివరించారు. శ్రీరామానుజులు గీతకు అద్భుతమైన భాష్యాన్ని అనుగ్రహించారు. వేదాంతాచార్యులు శ్రీరామానుజుల గీతాభాష్యాన్ని మరింత విస్తరించి “తాత్పర్యచంద్రిక” అనే వ్యాఖ్యానాన్ని రచించారు. ఈ వ్యాఖ్యానాలు అనేక శాస్త్రప్రమాణాలతో గీతాశ్లోకాల యథార్థార్థాన్ని మనకు వెల్లడిస్తాయి.
ఈ సంఘటన యొక్క సారాంశం:
- భగవానుడు కూడా ఆచార్యస్థానాన్ని కోరుకుంటాడని మన పూర్వాచార్యులు చెబుతారు. అందుకే ఆయన గీతాచార్యుడిగా అవతరించాడు. ఆచార్యస్థానం భగవానునికి కూడా ప్రీతికరమైనది.
- అర్జునునిలో దిగ్భ్రాంతి కలిగించినవాడూ భగవానుడే. అర్జునుణ్ణి ఒక సాధనంగా చేసుకొని గీతాశాస్త్రాన్ని ప్రపంచానికి ఉపదేశించాడు.
- అర్జునునికి సారథిగా నిలవడం భగవంతుని సౌలభ్యానికి, ఆశ్రితపారతంత్ర్యానికి పరాకాష్ఠ.
- అర్జునునికి విశ్వరూపాన్ని చూపించడం భగవంతుని పరత్వానికి పరాకాష్ఠ.
మూలం : https://granthams.koyil.org/2023/10/28/krishna-leela-52-english/
అడియేన్ ఆకాష్ రామానుజ దాసన్
పొందుపరిచిన స్థానము – https://granthams.koyil.org
ప్రమేయము (గమ్యము) – https://koyil.org
ప్రమాణము (ప్రమాణ గ్రంథములు) – https://granthams.koyil.org
ప్రమాత (ఆచార్యులు) – https://acharyas.koyil.org
శ్రీవైష్ణవ విద్య / పిల్లల కోసం – https://pillai.koyil.org