ఐప్పసి అనుభవం – పొయ్‌గై ఆళ్వార్ – ముదల్ తిరువందాది

శ్రీః శ్రీమతే శఠగోపాయ నమః శ్రీమతే రామానుజాయ నమః శ్రీమద్ వరవరమునయే నమః శ్రీ వానాచల మహామునయే నమః

పూర్తి ధారావాహిక

పొయ్‌గై ఆళ్వార్ల ‘ముదల్ తిరువందాది’కి నంపిళ్ళై అందించిన అవతారిక యొక్క ఆంగ్ల అనువాద వివరణ యొక్క తెలుగు అనువాదం ఇది. నంపిళ్ళై గారి వ్యాఖ్యానాలను ప్రచురించి, సులభమైన తమిళ వివరణను అందించిన శ్రీ ఉ. వే. ఎం. ఎ. వేంకటకృష్ణన్ స్వామి వారి కృషికి కృతజ్ఞులం. 

నంపిళ్ళై – తిరువల్లిక్కేణి

పొయ్‌గై ఆళ్వార్, పూదత్తాళ్వార్, మరియు పేయాళ్వార్ (ముదలాళ్వార్లు) భగవద్విషయంలో పరిపూర్ణ అనుభూతిని పొందారు. పరమపదంలోని నిత్యసూరుల వలె సంసారంలో నివసించిన పరమ భక్తులు. సంసారంలో (లౌకిక ప్రపంచంలో) వారి జీవనశైలి, పరమపదానికి చేరి జ్ఞాన పరిపూర్ణతను పొందిన ముక్తాత్మలు తిరిగి సంసారంలోకి వచ్చి జీవిస్తున్నట్లుగా ఉండేది; భగవద్విషయంలో తన్మయత్వం చెందిన వారిలో వీరే అగ్రగాములు. ఇతర ఆళ్వారుల కంటే వీరు భగవద్విషయంలో అధికంగా నిమగ్నమై ఉండటం వల్ల, వీరిని పరమపదంలో భగవంతుని నిత్య పరివారమైన ‘నిత్యసూరి’లతో సమానంగా పరిగణిస్తారు. నమ్మాళ్వార్లు ముదలాళ్వార్లని ‘తిరువాయ్మొళి’ (7.9.6)లో “ఇన్కవి పాడుమ్ పరమ కవిగళ్” (మధురమైన కవిత్వాన్ని ఆలపించే శ్రేష్ఠమైన కవులు) అని, తిరుమంగై ఆళ్వార్లు ‘పెరియ తిరుమొళి’ (2.8.2)లో “చెంతమిళ్ పాడువార్” (శుద్ధమైన తమిళంలో పాడేవారు) అని కీర్తించారు. వీరు పరత్వము నుండి అర్చావతారం (https://granthams.koyil.org/2012/10/archavathara-anubhavam-parathvadhi/) వరకు గల ఎంపెరుమానుని వివిధ స్వరూపాల పట్ల గాఢమైన అనురాగాన్ని కలిగి ఉండేవారు; వారి జ్ఞానం మరియు భక్తి ఈ వివిధ స్వరూపాలపై విస్తరించి ఉండేవి. అయినప్పటికీ, వరద సమయంలో నదిలో నీరు అంతటా నిండి ఉన్నప్పటికీ అది ఒక నిర్దిష్ట దిశలో ప్రవహించినట్లుగా, వీరి ధ్యాస ప్రధానంగా త్రివిక్రమావతారం (విభవావతారాలలో) మరియు తిరువేంకటముడైయాన్ (అర్చావతారాలలో) పైనే కేంద్రీకృతమై ఉండేది. 

తిరుమంగై ఆళ్వార్లు తమ ‘పెరియ తిరుమొళి’ (11.8.9) పాశురంలో ఈ క్రింది విధంగా వివరించారు: “ఆన్ విడైయేళ్ అన్రడర్త్తార్కు ఆళానార్ అల్లాదార్ మానిడవర్ అల్లర్ ఎన్రు ఎన్ మనత్తే వైత్తేన్” – “ఎవరైతే ఆనాడు ఏడు ఎద్దులను సంహరించిన శ్రీకృష్ణునికి దాసులు కాలేదో, వారు మానవ జన్మ ఎత్తినప్పటికీ వారిని నేను అస్సలు మనుషులుగానే పరిగణించనని నా మనస్సులో గట్టిగా నిశ్చయించుకున్నాను.” ఎంపెరుమాన్ పట్ల దాసత్వం లేని వారిని ముదలాళ్వార్లు అసలు మనుషులుగానే గుర్తించరు. ఇక్కడ “ఎన్ మనత్తే వైత్తేన్” (నా మనస్సులో ఇలా నిశ్చయించుకున్నాను) అని చెప్పడం ద్వారా ఈ క్రింది ముఖ్యమైన అంశం నొక్కి చెప్పబడింది – సర్వేశ్వరుడు అపారమైన దయామయుడే అయినప్పటికీ, ఆయన పరమ స్వతంత్రుడు (స్వతంత్ర శక్తి కలవాడు). కాబట్టి, ఆయన ఒకవేళ అలాంటి లౌకిక వ్యక్తులను ఉద్ధరించడానికి నిరాకరించినా అందులో ఆశ్చర్యం లేదు. కానీ, ఆళ్వార్లు ఎంతటి కరుణామయులంటే – సాక్షాత్తు ఎంపెరుమానుని వదిలిపెట్టిన వారిని సైతం వారు తమ కృపతో ఉద్ధరిస్తారు. అయితే, అంతటి పరమ దయాళువులైన ఆళ్వార్లు సైతం, ఎంపెరుమాన్ పట్ల కనీస ఆసక్తి లేని వారిని పూర్తిగా తిరస్కరిస్తున్నారు. దీనిని బట్టి, భగవానుని పట్ల భక్తి, అనుబంధం లేని వారు మనుషులే కారని రాతిపై మరియు రాగి పలకపై చెక్కినట్లుగా (ఖచ్చితమైన పరమ సత్యంగా) నిరూపించబడింది.

కులశేఖర ఆళ్వార్లు తమ ‘పెరుమాళ్ తిరుమొళి’ (3.8) లో ఈ విధంగా చెప్పారు: “పేయరే ఎనక్కు యావరుమ్ యానుమోర్ పేయనే యవర్క్” – “ఎవరైతే భగవద్విషయంలో మునిగి ఉండరో, వారంతా నాకు పిచ్చివారిలా కనిపిస్తారు. అలాగే నేను వారిలా కాకుండా లౌకిక సుఖాలకు దూరంగా ఉన్నాను కాబట్టి, నేను వారికి ఒక పిచ్చివాడిలా కనిపిస్తాను.” ‘ఇరండ్రామ్ తిరువంతాది’ (44) లో చెప్పబడినట్లుగా: “చిఱన్తార్క్కు ఎళుతుణైయామ్ చెంగణ్మాల్ నామమ్ మఱన్తారై మానిడమా వైయేన్” – ఈ ముదలాళ్వార్లు భగవానుని పట్ల భక్తి లేని వారిని అసలు సభ్య సమాజానికి చెందిన మనుషులుగా కూడా పరిగణించరు. అందుకే, బుద్ధి ఉన్న మనుషులుగా పుట్టి కూడా భగవానునిపై ద్వేషం పెంచుకునే అలాంటి లౌకిక వ్యక్తుల మధ్య జీవించడం కంటే – మనుషులు ఎవరూ లేని అడవులలో నివసించడమే మేలని వారు భావించారు. అడవులలో కూడా వారు ఒకే చోటికి కట్టుబడి ఉండేవారు కాదు. సాయంత్రం వేళకు వారు ఎక్కడికి చేరుకుంటే, ఆ రాత్రిని అక్కడే గడిపేవారు. ఒకరికొకరు తెలియకుండా, ఎవరికి వారే విడివిడిగా భగవచ్చింతనలో సంచరిస్తూ ఉండేవారు.

పుష్పవల్లి తాయార్ సమేత దేహళీశ పెరుమాళ్ – తిరుక్కోవలూర్

ముదలాళ్వార్లు – తిరుక్కోవలూర్

భగవానుని సంకల్పం ప్రకారం, ఒక భీకర వర్షం కురుస్తున్న రోజున ముగ్గురు ఆళ్వార్లు తిరుక్కోవలూర్ ప్రాంతానికి చేరుకుంటారు. మొదట పొయ్‌గై ఆళ్వార్లు అక్కడ ఉన్న మృకండ మహర్షి ఆశ్రమపు ‘ఇడైకళి’ (నడవ) లోకి ప్రవేశిస్తారు. ఆ తర్వాత పూదత్తాళ్వార్లు అక్కడికి చేరుకుని తలుపు తడతారు. లోపల ఉన్న పొయ్‌గై ఆళ్వార్లు “నేను ఇక్కడ పడుకుని ఉన్నాను, ఇక ఇక్కడ అస్సలు చోటు లేదు” అని అంటారు. అందుకు పూదత్తాళ్వార్ బయట నుండి “ఒక్కరు పడుకోవడానికి సరిపోయే చోటు, ఇద్దరు కూర్చోవడానికి ఖచ్చితంగా సరిపోతుంది; కాబట్టి దయచేసి తలుపు తీయండి” అని బదులిస్తారు. ఇది విన్న పొయ్‌గై ఆళ్వార్లు – “సాధారణంగా ఈ సంసారంలో (ప్రపంచంలో) చాలామంది ఇతరుల శ్వాస తగలడాన్ని కూడా ఇష్టపడరు (అపరిచితులకు అంత దగ్గరగా ఉండటానికి ఇష్టపడరు). అలాంటిది ఈ వ్యక్తి ఇలా మాట్లాడుతున్నాడంటే ఈయన సామాన్యుడు కాదు” అని భావించి తలుపు తీస్తారు. అప్పుడు వారిద్దరూ అక్కడ హాయిగా కూర్చుంటారు. ఆ సమయంలో, పేయాళ్వార్లు అక్కడికి చేరుకుని తలుపు తడతారు. లోపల ఉన్న ఆ ఇద్దరూ “మేము ఇద్దరం ఇక్కడ కూర్చుని ఉన్నాము, ఇక ఇక్కడ అస్సలు చోటు లేదు” అని చెబుతారు. అప్పుడు పేయాళ్వార్లు బయట నుండి “ఇద్దరు కూర్చునే చోటులో, ముగ్గురు సులభంగా నిలబడవచ్చు” అని సమాధానమిస్తారు. ఈయన కూడా సామాన్యుడు కాదని గ్రహించి, ఆ ఇద్దరూ ఆయనను లోపలికి రానిస్తారు. ఇప్పుడు ఆ ముగ్గురూ అక్కడ హాయిగా నిలబడతారు. 

ఆ సమయంలో, ‘ముదల్ తిరువందాది’ (86వ పాశురం) లో “నీయుమ్ తిరుమగళుమ్ నిన్రాయాల్” (అత్యంత దయామయుడైన ఎంపెరుమాన్ మరియు పిరాట్టి/ ఇద్దరూ కలిసి నిలిచినప్పుడు) అని చెప్పబడినట్లుగా – సాక్షాత్తు సర్వేశ్వరుడు తన దివ్య మహిషితో కలిసి అక్కడికి వేంచేసి, వారి నడుమ నిలబడి ఆ స్థలాన్ని మరింత ఇరుకుగా మారుస్తాడు. అప్పుడు ఆళ్వార్లలో ఒకరు ఆశ్చర్యపోతూ – “ఇక్కడ ఏం జరుగుతోంది? మేము ముగ్గురమే ఉన్నామనుకున్నాము, కానీ ఇక్కడ ఇంకా ఎవరో ఎక్కువ మంది ఉన్నట్లు అనిపిస్తోంది. ఇక్కడ ఇంకెవరున్నారో చూడటానికి మనం ఒక దీపాన్ని వెలిగించాలి” అని అంటారు. (భగవానునికి తన భక్తులు ఒంటరిగా ఉన్నప్పుడే వారిపై అపారమైన వాత్సల్యం ఉంటుంది, అలాంటిది భక్తులంతా ఒకే చోట గుమిగూడినప్పుడు ఆయన పొందే ఆనందం గురించి చెప్పనలవి కాదు కదా!). వెంటనే, పొయ్‌గై ఆళ్వార్లు భగవానునిడే ఉభయ విభూతులకు (ఆధ్యాత్మిక మరియు భౌతిక ప్రపంచాలకు) అధిపతి అని చాటుతూ ఒక జ్ఞాన దీపాన్ని వెలిగిస్తారు; పూదత్తాళ్వార్లు ఒక భక్తి దీపాన్ని వెలిగిస్తారు; మరియు పేయాళ్వార్లు ఆ దీపాల వెలుగులో భగవానుని దివ్య మంగళ స్వరూపాన్ని లక్ష్మీదేవితో సహా దర్శిస్తారు. ఇది ఎలా ఉందంటే – భగవత్ సాక్షాత్కారానికి సంబంధించిన మూడు దశలు (జ్ఞానం, భక్తి, దర్శనం) ఒకే వ్యక్తిలో వరుసగా సంభవించినట్లుగా అనిపిస్తుంది.

అనగా, మొదట మనం సరైన జ్ఞానాన్ని సంపాదిస్తాము, ఆ తర్వాత అది భక్తిగా పరిపక్వం చెందుతుంది, చివరకు అది భగవానుని దివ్య సాక్షాత్కారానికి దారితీస్తుంది. వ్యాకరణ శాస్త్రంలో, పాణిని, వరరుచి మరియు పతంజలి అనే ముగ్గురు మునులు వరుసగా వ్యాకరణ సూత్రాలు, వృత్తి (సంక్షిప్త వివరణ) మరియు భాష్యం (వ్యాఖ్యానం) రాసినప్పటికీ, వారంతా ఒకే విషయం గురించి మాట్లాడారు కాబట్టి ఆ మూడింటినీ ఒకే జ్ఞాన వస్తువుగా పరిగణించి “త్రిముని వ్యాకరణం” (ముగ్గురు మునుల వ్యాకరణం) అని పిలుస్తారు. అదేవిధంగా, మొదటి ముగ్గురు ఆళ్వార్లు రాసిన మూడు తిరువంతాది ప్రబంధాలకు కర్తృ భేదం (వేర్వేరు రచయితలు) ఉన్నప్పటికీ, వాటి అంతరార్థం ఒక్కటే కాబట్టి వాటన్నింటినీ ఒకే దివ్య ప్రబంధంగా భావించవచ్చు.

“ఎంపెరుమాన్ కానిదంతా ఆయన సొత్తేననే” అవగాహనతో పొయ్‌గై ఆళ్వార్లు జ్ఞాన దీపాన్ని, ఆ జ్ఞానంతో పూదత్తాళ్వార్లు భక్తి దీపాన్ని వెలిగించగా, ఆ భక్తి ఫలితాన్ని పేయాళ్వార్లు భగవత్ సాక్షాత్కారంగా అనుభవించారు. ఈ అనుభవాన్ని, ఆనందాన్ని ఇతరులతో పంచుకోవడానికి మరియు ఉద్ధరించడానికి, వారు ముదల్, ఇరండ్రామ్ మరియు మూన్రామ్ తిరువందాది అనే మూడు దివ్య ప్రబంధాలను రూపొందించారు.

మొదటగా తగళి (ప్రమిద), నెయ్ (నెయ్యి) మరియు విళక్కు (దీపం/వెలుగు) అంటే ఏమిటో మనం అర్థం చేసుకుందాం. ఈ జగత్తు (ప్రపంచం) అనేది “సావయత్వాత్ కార్యం” (భాగాలను కలిగి ఉన్నది కాబట్టి ఇది ఒక కార్యం/ఫలితం) అని వివరించబడింది. ఎక్కడైతే ఒక “కార్యం” ఉంటుందో, దానిని సృష్టించిన “కారణం” లేదా కర్త ఒకరు ఖచ్చితంగా ఉండి తీరాలి. ఈ సృష్టి ఎంతో వైవిధ్యభరితంగా మరియు అద్భుతంగా ఉంది కాబట్టి, దీనిని సృష్టించిన కర్త (కారణం) కూడా అత్యంత శక్తిమంతుడు మరియు అద్భుతమైనవాడు అయి ఉండాలి. ఇక్కడ శంఖ చక్రాలను ధరించిన ఆ శ్రీమన్నారాయణుడే ఆ సర్వోన్నత కర్తగా కొనియాడబడ్డాడు. అయితే ఇక్కడ ఒక సందేహం తలెత్తుతుంది. భాష్యకారులైన శ్రీ రామానుజాచార్యుల వారు బ్రహ్మసూత్రం (1.1.3) “శాస్త్రయోనిత్వాత్” కు వ్యాఖ్యానం రాస్తూ – కేవలం అనుమానం ద్వారానే బ్రహ్మాన్ని (దేవుడిని) స్థాపించవచ్చని వాదించే అనుమానికులను తీవ్రంగా ఖండించారు; బ్రహ్మాన్ని కేవలం శాస్త్రం (వేదాలు) ద్వారా మాత్రమే తెలుసుకోగలమని ఆయన స్పష్టం చేశారు. మరి అలాంటప్పుడు, పొయ్‌గై ఆళ్వార్ ఇక్కడ అనుమానం ఆధారంగా (అనగా వైవిధ్యభరితమైన సృష్టి ఉంది కాబట్టి దీని వెనుక ఒక శక్తిమంతమైన సృష్టికర్త ఉండి తీరాలి అనే తర్కంతో) బ్రహ్మాన్ని ఎందుకు స్థాపిస్తున్నారు?. దీనికి సమాధానం మనుస్మృతి (12.106) లోని ఈ శ్లోకం ద్వారా వివరించబడింది: “ఆర్షం ధర్మోపదేశం చ వేదశాస్త్రావిరోధినా, యస్తర్కేణానుసంధత్తే సధర్మం వేద నేతరః” –  ఋషులు దర్శించిన వేదాలను, ధర్మాన్ని ప్రతిపాదించే స్మృతులను వేద శాస్త్రాలకు విరోధం లేని తర్కంతో ఎవరైతే విశ్లేషిస్తారో, వారు మాత్రమే నిజమైన ధర్మాన్ని గ్రహించగలరు, ఇతరులు గ్రహించలేరు. దీనిని బట్టి, వేద శాస్త్రాలకు విరుద్ధంగా ఉండే అనుమానం (తర్కం) ఖండించదగినది. కానీ వేద శాస్త్రాల సిద్ధాంతాలకు అనుకూలంగా, వాటికి మద్దతుగా ఉండే అనుమానం (తర్కం) అంగీకరించబడుతుంది. కాబట్టి, ఇక్కడ శాస్త్ర సమ్మతంగా ఉన్న ఆళ్వార్ల తర్కం పూర్తిగా అంగీకారయోగ్యమైనది. శ్రీభాష్యం ప్రారంభంలో కూడా “న్యాయ అనుగృహీతస్య వాక్యస్య అర్థ నిశ్చాయకత్వాత్” అని చెప్పబడింది – అనగా న్యాయము (తర్కం/ఆధారాలు) తో కూడిన వాక్యాలకు మాత్రమే పరమ సత్యాన్ని స్థాపించే సామర్థ్యం ఉంటుంది.

పొయ్‌గై ఆళ్వార్ల ‘ముదల్ తిరువందాది’ ప్రబంధానికి నంపిళ్ళై గారు అందించిన అవతారిక ముగిసింది. 

ముదలియాణ్డాన్ అనుగ్రహించిన ‘ముదల్ తిరువందాది’ యొక్క తనియన్ విశేషాలను ఇప్పుడు సంక్షిప్తంగా చూద్దాం. సాధారణంగా తనియన్లు ఆ దివ్య ప్రబంధాన్ని రచించిన వారి యొక్క వైభవాన్ని మరియు ఆ ప్రబంధం యొక్క గొప్పతనాన్ని వెల్లడిస్తాయి.

పొయ్‌గై ఆళ్వార్లు – తిరువెక్కా

కైదై సేర్ పూంపోళిల్ సూళ్ కచ్చి నగర్ వందుదిత్థ

పొయ్గైప్ పిరాన్ కవింగ్యర్ పోరేఱు

వైయత్తు అడియవర్గళ్ వాళ అరుంతమిళ్ నూట్రందాది

పడివిళంగచ్చెయ్దాన్ పరిందు.

సరళమైన అనువాదం: నందనవనాలతో చుట్టుముట్టబడిన పరమ పవిత్రమైన కాంచీపురం (తిరువెక్కా) దివ్యదేశంలో పొయ్‌గై ఆళ్వార్లు అవతరించారు. కవులలో శ్రేష్ఠులైన ఆళ్వార్లు, శ్రీమన్నారాయణుని భక్తులపై ఉన్న అపారమైన వాత్సల్యంతో వారి ఉద్ధరణ కొరకు – దివ్యమైన ఆధ్యాత్మిక సిద్ధాంతాలను సమగ్రంగా స్థాపించేలా అంతాది శైలిలో 100 మధురమైన తమిళ పాశురాలను (ముదల్ తిరువందాది) అనుగ్రహించారు.

ముదలాళ్వార్ల చరిత్ర మరియు వైభవం ఇక్కడ చూడవచ్చు: https://acharyas.koyil.org/index.php/2012/10/22/mudhalazhwargal/ 

ముదలాళ్వార్ల అర్చావతార అనుభవాన్ని ఇక్కడ చూడవచ్చు: https://granthams.koyil.org/2012/10/archavathara-anubhavam-azhwars-1/ 

ఆంగ్లంలో: https://granthams.koyil.org/2013/10/23/aippasi-anubhavam-poigai-azhwar-mudhal-thiruvanthadhi/       

అడియేన్ దాసరి కేశవ కృష్ణ రామానుజ దాసన్

ప్రూఫ్ రీడింగ్ చేసినవారు – ప్రసూన రామానుజ దాసి

https://granthams.koyil.org లో ఆర్కైవ్ ఉంచబడినది.

ప్రమేయం (లక్ష్యం) – https://koyil.org
ప్రమాణం (గ్రంధాలు) – https://granthams.koyil.org
ప్రమాతా(ఉపదేశకులు) – https://acharyas.koyil.org
శ్రీవైష్ణవ విద్యా/పిల్లల పోర్టల్ – https://pillai.koyil.org